ENG     26 Fevral 2017 -ci il
 
  Aktual
  Xəbərlər
  Cəmiyyət
  Maarifləndirmə
  Hadisə
  Müxtəlif
  Arxiv
23 Fevral 2017-ci il
N 07 (522)

Əlaqə
Redaksiyanın ünvanı:
.......................................
Bakı şəhəri, Əliyar Əliyev küçəsi 3
.......................................
Tel.: 566 86 70
Faks: 566 86 71
566 86 74
566 86 79






  Baş səhifə / Aktual

Azərbaycan. 2016-cı ilin əsas hadisələri

2016-cı il Azərbaycan üçün bir sıra mühüm hadisələrlə əlamətdar olub. AZƏRTAC yola saldığımız ilin əsas hadisələrini təqdim edir.

Bakıda Azərbaycan, Rusiya və İran prezidentlərinin Zirvə görüşü keçirilib

Avqustun 8-də Azərbaycan Prezidenti İlham Əliyevin, İran Prezidenti Həsən Ruhaninin və Rusiya Prezidenti Vladimir Putinin iştirakı ilə keçirilən Zirvə görüşündə üç ölkə arasında siyasi, iqtisadi, energetika, nəqliyyat və digər sahələrdə əməkdaşlığın genişləndirilməsi məsələləri ətrafında müzakirələr aparılıb. Dövlət başçıları Zirvə görüşünün Birgə Bəyannaməsini imzalayıblar.

Azərbaycan, Rusiya və İran prezidentlərinin üçtərəfli formatda görüşü tarixi hadisə kimi qiymətləndirilir. Çünki bu ölkələrin dövlət başçıları tarixdə ilk dəfə olaraq üçtərəfli görüş keçiriblər.

Azərbaycan Konstitusiyasına təklif olunan əlavə və dəyişikliklər referenduma çıxarılıb və qəbul edilib

Sentyabrın 26-da keçirilən ümumxalq səsverməsində ölkə üzrə qeydə alınmış 5 milyon 276 min 111 seçicinin 3 milyon 671 min 707-si, yəni, 69,7 faizi iştirak edib. Səsverməni 53 mindən çox yerli müşahidəçi, 33 ölkədən 117 beynəlxalq müşahidəçi, 16 nüfuzlu beynəlxalq KİV-in nümayəndələri izləyiblər.

Konstitusiyaya edilən dəyişikliklərə əsasən Azərbaycan Respublikası Prezidentinin səlahiyyət müddəti beş ildən yeddi ilədək artırılıb, ölkədə birinci vitse-prezident və vitse-prezidentlər vəzifələri təsis olunub. Həmçinin prezident və deputat seçilmək üçün müvafiq olaraq 35 və 25 yaş məhdudiyyətləri aradan qaldırılıb. Ümumilikdə, Konstitusiyanın 23 maddəsində dəyişiklik edilib, Əsas Qanuna 6 yeni maddə əlavə edilib.

Siyasi analitiklər referendumun nəticələrini Azərbaycan xalqının Prezident İlham Əliyevə yüksək etimadının göstəricisi kimi qiymətləndirirlər.

Azərbaycan ordusunun gücünü nümayiş etdirən aprel döyüşləri baş verib

Azərbaycan Silahlı Qüvvələri aprelin 1-dən 2-nə keçən gecədən başlayaraq Ermənistan silahlı qüvvələrinin təxribatlarına cavab olaraq düşmənə tutarlı zərbələr endirib. Aprelin 5-dək davam edən dördgünlük döyüşlər zamanı ordumuz bir sıra strateji nöqtələri - Goranboy rayonuna və Naftalan şəhərinə təhlükə yarada biləcək Talış kəndi ətrafındakı yüksəklikləri, eləcə də Seysulan məntəqəsini düşməndən azad edib, Füzuli rayonu istiqamətində yerləşən Lələtəpə yüksəkliyinə nəzarəti ələ keçirib.

Döyüşlər nəticəsində Azərbaycan Silahlı Qüvvələri Ağdərə-Madagiz istiqamətində yolların nəzarətdə saxlanılmasını təmin etdi. Ümumilikdə 2000 hektardan çox ərazi işğaldan azad olundu. Döyüşlərin gedişində Ermənistan silahlı qüvvələrinin çox sayda canlı qüvvəsi və texnikası məhv edildi.

Trans-Adriatik boru kəməri - TAP-ın təməli qoyulub

Təməlqoyma mərasimi mayın 17-də Yunanıstanın Saloniki şəhərində keçirilib. Yunanıstanın Baş naziri Aleksis Tsipras və TAP layihəsinin icraçı direktoru Yan Bradşou çıxış edərək layihənin Avropanın enerji təhlükəsizliyində mühüm rolundan danışıblar.

TAP layihəsinin reallaşması ilə Avropa bazarlarına yeni qazın çıxışına şərait yaranacaq. Bu fikir isə ABŞ dövlət katibi Con Kerrinin TAP-ın təməlqoyma mərasimi iştirakçılarına ünvanladığı məktubda əksini tapıb.

Azərbaycanın Baş nazirinin birinci müavini Yaqub Eyyubov çıxışında bildirib ki, “Cənub Qaz Dəhlizi” layihəsinin bir hissəsi olan TAP kəməri ilə “Şahdəniz-2” layihəsi çərçivəsində hasil edilən Azərbaycan qazı Avropaya nəql ediləcək. TANAP-a qoşulacaq bu boru kəməri ilə ilkin mərhələdə Avropaya ildə 10 milyard kubmetr mavi yanacaq çatdırılacaq.

Roma Papası Fransisk Azərbaycanda pastoral səfərdə olub

Oktyabrın 2-də Bakıda səfərdə olan Roma Papası Azərbaycan Respublikasının Prezidenti İlham Əliyev və xanımı Mehriban Əliyeva ilə görüşüb. Prezident İlham Əliyev və Papa Fransisk Heydər Əliyev Mərkəzində ictimaiyyətin nümayəndələri qarşısında çıxış ediblər. Həmçinin Roma Papası Fransiskin iştirakı ilə Bakıdakı Katolik Kilsəsində dua mərasimi keçirilib.

Bu, Azərbaycan tarixində Vatikan rəhbərinin ölkəmizə ikinci səfəri idi. Bundan əvvəl 2001-ci ildə Papa II İohann Pavel Azərbaycana səfər etmişdi.

Bakıda BMT-nin Sivilizasiyalar Alyansının VII Qlobal Forumu keçirilib

Aprelin 25-27-də keçirilən Forumun açılışında Azərbaycan Prezidenti İlham Əliyev, Türkiyə Prezidenti Rəcəb Tayyib Ərdoğan, Malta Prezidenti Mari-Luiz Koleyro Preka, digər ölkələrin, beynəlxalq və regional təşkilatların yüksək səviyyəli rəsmiləri, mədəniyyət, media nümayəndələri iştirak ediblər.

“İnklüziv cəmiyyətlərdə birgəyaşayış: çağırış və məqsəd” devizi altında keçirilən Forumda fərqli dinlər, mədəniyyətlər və sivilizasiyalar arasında dialoqun inkişafı, mövcud problemlərin aradan qaldırılması kimi aktuallıq kəsb edən məsələlər müzakirə olunub, Bakı Bəyannaməsi qəbul edilib.

Bu Forumun Bakıda keçirilməsi haqqında qərar 2014-cü il sentyabrın 26-da BMT Baş Məclisinin 69-cu sessiyasında qəbul olunmuşdu.

Bakı Dünya Xəbər Agentliklərinin V Konqresinə və OANA-nın XVI Baş Assambleyasına ev sahibliyi edib

Heydər Əliyev Fondunun və AZƏRTAC-ın birgə təşkilatçılığı ilə keçirilən Dünya Xəbər Agentliklərinin V Konqresinin, Asiya və Sakit Okean Ölkələri Xəbər Agentlikləri Təşkilatının (OANA) XVI Baş Assambleyasının birgə açılış mərasimində Azərbaycan Prezidenti İlham Əliyev nitq söyləyib. Daha sonra Prezident tədbir iştirakçılarının bir qrupunu qəbul edib.

Noyabrın 16-18-də keçirilən tədbirlərdə 80 ölkədən 130 xəbər agentliyinin 200 rəhbəri və təmsilçisi, media üzrə beynəlxalq ekspertlər, BMT-UNESCO-nun rəsmi nümayəndəsi, həmçinin regional media qurumlarının əməkdaşları iştirak ediblər.

Konqres çərçivəsində “Xəbər istehlakının gələcəyi”, “Xəbər agentlikləri – yeni texnologiyaların və sosial medianın çağırışları və imkanları”, “Xəbər agentliklərinin innovasiyası”, “Multimedianın gələcəyi üçün jurnalistlərin təlimi”, “Jurnalistlərin missiyasının qorunması: azadlıq, çıxış imkanı, təhlükəsizlik və münaqişə zonaları” mövzularında məruzələr dinlənilib, müzakirələr aparılıb.

2016-2019-cu illərdə Dünya Xəbər Agentlikləri Konqresinə, həmçinin OANA-ya sədrlik etmək hüququ AZƏRTAC-a keçib.

Bakıda Formula-1 Avropa Qran-prisi və 42-ci Ümumdünya Şahmat Olimpiadası keçirilib

İyunun 17-19-da Bakıda Formula-1 Avropa Qran-pri yarışları keçirilib. Formula-1 üzrə dünya çempionatının səkkizinci mərhələsi olan Bakı Qran-prisini 187 ölkədən 500 milyon tamaşaçı izləyib. Yarışlar “Mercedes” komandasının almaniyalı pilotu Niko Rosberqin qələbəsi ilə başa çatıb.

Sentyabrın 1-14-də Bakı 42-ci Ümumdünya Şahmat Olimpiadasına ev sahibliyi edib. Bakı Olimpiadasında dünyanın 175 ölkəsini təmsil edən və heyətində dünyanın ən güclü şahmatçıları olan 181 kişi və 142 qadın komandanın 1600-dən çox üzvü iştirak edib. Bu, iştirakçı ölkələrin sayına görə Olimpiada tarixində rekord göstəricidir.

Azərbaycan bu Olimpiadada üç kişi və üç qadın komandası ilə təmsil olunub.

Mingəçevir Sənaye Parkının təməli qoyulub

Sentyabrın 21-də keçirilən təməlqoyma mərasimində Azərbaycan Prezidenti İlham Əliyev iştirak edib.

Mingəçevir Sənaye Parkının nəzdində 9 müəssisə inşa ediləcək. Burada, həmçinin tibbi kosmetika məhsulları istehsalı müəssisəsi, ölkəmizdə hazır geyim məhsullarına olan tələbatı ödəmək və idxaldan asılılığı azaltmaq məqsədilə Azərbaycanın və bütövlükdə Qafqazın ən nəhəng tikiş fabriki yaradılacaq.

Azərbaycanın yüngül sənayesinin inkişafında əvəzolunmaz rol oynayacaq Mingəçevir Sənaye Parkında ilkin mərhələdə 2 min, sonra 5500-dən çox yeni iş yerinin açılması nəzərdə tutulur.

Bakı Metropoliteninin yeni “Avtovağzal” və “Memar Əcəmi” stansiyaları açılıb

Metronun yeni stansiyalarının açılışı aprelin 19-da Azərbaycan Respublikasının Prezidenti İlham Əliyevin iştirakı ilə olub.

Tikintisinə 2009-cu ilin sentyabrında başlanılan stansiyanın layihə işləri “Bakımetrolayihə” İnstitutu tərəfindən yerinə yetirilib. “Avtovağzal”–”Memar Əcəmi” mənzil tunellərinin və “Memar Əcəmi” stansiyasının layihə işləri dünyanın aparıcı şirkətləri tərəfində həyata keçirilib.

Hər iki stansiyanın inşasında əsasən yerli xammaldan istifadə olunub.

Ukrayna-Gürcüstan-Azərbaycan-Qazaxıstan-Çin marşrutu üzrə konteyner sınaq qatarı yola salınıb

Bu münasibətlə yanvarın 15-də keçirilən mərasimdə Ukrayna Baş nazirinin müavini Gennadi Zubko, infrastruktur naziri Andrey Pivovarski, iqtisadi inkişaf naziri Ayvaras Abromaviçus və digər rəsmi şəxslər iştirak ediblər.

Marşrut Qara dənizin İlyiçevsk-Batumi və Xəzər dənizinin Ələt-Aktau-Port bərə keçidlərini əhatə edir. Eksperimental reysə bərə keçidləri və quru yol daxildir. Bu marşrutla ayda səkkiz qatar hərəkət edəcək.



Qəzetin çap variantı




Qəzet Azərbaycan Respublikasının Ədliyyə Nazirliyində qeydiyyatdan keçmişdir. Qeydiyyat nömrəsi - 1873.
Təsisçi Azərbaycan Respublikası Fövqəladə Hallar Nazirliyi.
Bütün hüquqlar qorunur.
© 2009-cu il