ENG     18 Fevral 2018 -ci il
 
  Aktual
  Xəbərlər
  Cəmiyyət
  Maarifləndirmə
  Hadisə
  Müxtəlif
  Arxiv
9 Fevral 2018-ci il
N 04 (562)

Əlaqə
Redaksiyanın ünvanı:
.......................................
Bakı şəhəri, Əliyar Əliyev küçəsi 3
.......................................
Tel.: 566 86 70
Faks: 566 86 71
566 86 74
566 86 79






  Baş səhifə / Maarifləndirmə
Maarifləndirmə
9 Fevral 2018 Mənzillərin yanğın təhlükəsizliyi
9 Fevral 2018 Uşaqları nəzarətsiz qoymayın!
9 Fevral 2018 Fövqəladə hallarla bağlı davranış qaydaları
Avtomobil qəzaları
9 Fevral 2018Föv­qə­la­də Hal­lar Na­zir­li­yi xə­bər­dar­lıq edir:
Dəm qazı təhlükəsi
9 Fevral 2018 "112"/"101" QAYNAR TELEFON XƏTTİNƏ BU HALLARDA MÜRACİƏT ETMƏK OLAR:

Mənzillərin yanğın təhlükəsizliyi

Mənzillərdə yanğın təhlükəsizliyi haqqında cox yazılıb, çox deyilib. Buna baxmayaraq vətəndaşlarımız eyni səhvləri yenidən buraxır, beləliklə də yeni-yeni yanğınlara, digər fəlakətlərə yol açır, nəticədə isə ağır xəsarətlərlə xəstəxanaya düşür və ya həyatlarını itirirlər.

Söz yox ki, yanğın baş verdikdə, ilk növbədə yanğınsöndürmə dəstəsinə zəng vuraraq yanğınsöndürənləri hadisə yerinə çağırmaq və yanğını mümkün qədər öz qüvvənizlə söndürməyə çalışmaq lazımdır.

Yanan elektrik cihazıdırsa, ilk öncə onu cərəyandan, sonra mənzili təcili olaraq xətdən ayırın və alışan elektrik cihazını (ütünü və ya televizoru) söndürməyə çalışın.Yadda saxlayın ki, yanan televizor və digər cihazlar ətrafa toksik maddələr və tüstü yaydığından, bu, həyatınız üçün həddən artıq təhlükəlidir. Alışan televizoru söndürmək üçün onu qalın bir parça ilə örtün və ya onun arxa panelində yerləşən dəliklərdən televizorun içərisinə su tökərək söndürün. Bu zaman televizorun önündə durmayın, axı kineskop partlaya bilər.

Yanğın baş verdikdə qapı və pəncərələri bağlayın ki, içəriyə daxil olan təmiz hava axını yanğını şiddətləndirməsin. Alovla mübarizə mümkünsüzdürsə, bağlı qapının yanlarını nəm parça ilə tıxın ki, tüstü içəriyə daxil olaraq sizi boğmasın. Yanan və güclü tüstülənmiş mənzildə əyilərək və ya sürünərək hərəkət edin, çünki döşəməyə yaxın ərazi yüxarıya qalxmağa meyilli tüstüdən qismən azaddır.

 Mənzillərdə yanğın adətən mətbəxdə baş verdiyindən, burada olarkən həddən artıq diqqətli olun! Yadda saxlayın ki, mətbəxdə və balkonda tezalışan maddə və mayelərin saxlanması qəti qadağandır. Hətta yuxarı mərtəbələrdən aşağıya atılan siqaret kötüyü küləklə sizin balkona gətirilə və orada saxlanılan maddə və mayeləri alışdıra bilər. Mətbəxdə isə küləkdən yellənən pərdələr yanan qaz plitəsinə yaxınlaşdıqda alışa bilər və beləliklə də böyük yanğına səbəb olar. Mətbəx və balkonları lüzumsuz əşyalarla doldurmayın. Bu, xüsusilə tezalışan maddə və mayelərə, eləcə də taxta mebel və şkaflara, ümumiyyətlə, alışa bilən hər bir materiala aiddir. Bir çox yanğınlar mətbəxdə isti qazan və tavalardan, onların içərisindəki qaynar yağdan çıxır.

Yağ alışmışsa, dərhal qazı və ya elektrik enerjisini kəsin, qazanı (tavanı) qapaqla və ya yaş parça ilə örtün və yağın, eləcə də qazanın (tavanın) soyumasını gözləyin, əks halda yağ yenidən yanmağa başlaya bilər. Qaynar yağ, piy alışaraq divar və ya döşəməyə düşmüşdürsə, onları söndürmək üçün yuyucu tozdan və ya tozlu odsöndürəndən istifadə edin. Spirallı elektrik plitəsi həddən artıq qızdıqda, onu cərəyandan ayırın və spiralı nəm parça ilə örtərək soyumasını gözləyin.

 Balkonlarda hər hansı əşya saxlamaq istəyirsinizsə, onları dəmir yeşiklərə və ya metaldan düzəldilmiş şkaflara yığın. Balkonda hər ehtimala qarşı bir vedrə su və ya qum saxlayın. Yadda saxlayın ki, alovu yaş parça, qum və hətta gül dibçəklərindəki qumla söndürmək su ilə söndürməkdən daha əlverişlidir. Odla mübarizədə qüvvəniz yetərincə olmadıqda, qiymətli əşyaları, sənədləri və pullarınızı götürərək dərhal həyətə qaçın. Yadda saxlayın ki, yanan mənzildə ən təhlükəsiz yerlər balkon və pəncərə yanlarıdır. Yanğınsöndürənlər burada sizi tez tapar və xilas edər. Küçəyə çıxdıqda isti geyinməyi də unutmayın. Qapı və pəncərələri ehtiyatla açın, yelçəkərə alovu şiddətləndirməyə imkan verməyin. Yanğın çıxdıqda balkon vasitəsilə qonşu mənzilə də keçmək və ya biri-birinə bağlanmış mələfələr vasitəsilə aşağı düşmək olar. Lakin bu zaman ehtiyatı əldən verməyin, xüsusilə də yuxarı mərtəbələrdən aşağı tullanmayın. Bu çox təhlükəlidir.

 Yanğın baş verdikdə qonşularınızı da xəbərdar etməyi unutmayın və qəti olaraq liftdən istifadə etməyin. Ümümiyyətlə, yaşadığınız binanın giriş-çıxışlarını, su hidrantlarının yerləşdirilməsini, təxliyə yollarını əvvəlcədən öyrənin və yadınızda saxlayın, çünki yanğın baş verdikdə buna vaxt qalmayacaq, bu isə sizin həyatınız bahasına başa gələ bilər.

FHN Dövlət Yanğın Nəzarəti  Xidmətinin

Yanğına qarşı təbliğat şöbəsi 

 

 



Uşaqları nəzarətsiz qoymayın!

Yaş qruplarına görə, bir yaşından kiçik uşaqlarda boğulma və tənəffüs yollarına xarici cisim düşməsi, 1-4 yaş arasında düşmə, yıxılma, qaynar sudan yanma, odla yanma və zəhərlənmə kimi hallar daha xarakterikdir. 2-4 yaşlarında təmizlik maddələri və ortada buraxılan dərmanlar, 5 yaşından sonra isə şkafda və yüksəkdə saxlanan dərmanlarla zəhərlənmələr müşahidə olunur.

Düşmələr daha çox masa, kreslo, uşaq kürsüsü kimi əşyalardan, nərdivandan, beşikdən, eyvan və pəncərədən, sürüşkən bir yerdən yıxılma ilə baş verir. Ayrıca, uşaqların şüursuzca hərəkət etməsi, yelləncəklərdə idarəsiz yellənməsi, hündür qapı ağızları, düzgün işıqlandırılmayan məkanlar da düşmə və yıxılmaya səbəb olur. Uşaqların anlayış qabiliyyətləri və təhlükəni önləyəcək bədən koordinasiyalarını hələ qazana bilməmiş olmaları və sürüşkən zəmində ani və sürətli hərəkət etmələri, mebellərin, nərdivanların üzərinə çıxmaq və bunların üzərindən atlanmaq istəmələri düşməyə gətirib çıxaran əsas səbəblərdəndir.

Alov nəticəsində, isti su və mayelər səbəbindən meydana gələn yanıqlar, kimyəvi yanıqlar və digər yanıqlar da uşaqların rastlaşdığı ekstremal vəziyyətlərdəndir. Bu hallar içərisində hamam və mətbəxdə, xüsusilə yemək əsnasında isti mayelərin tökülməsi nəticəsində meydana gələn yanma hadisələri daha çoxluq təşkil edir.

Zəhərlənmələr zəhərli maddələrin həddindən artıq dozada qəbul olunması ilə bağlı olaraq orqanizmdə ölümə gətirib çıxaran səviyyədə müxtəlif funksiya pozğunluqlarının ortaya çıxması ilə meydana gəlir. Zəhərlənmələr iməkləmə çağı ilə 5 yaş arası uşaqlarda sıx rast gəlinən ev qəzasıdır. Bu yaş qrupu uşaqlarda çox maraq, öyrənmə istəyi, tapdıqları hər şeyi ağızlarına aparma və böyükləri təqlid etmə həvəsi olur. Açıqda buraxılan dərman və ya buna bənzər zəhərli maddənin uşaq tərəfindən tapılması və içilməsi ciddi nəticələrə və ya onun ölümünə səbəb ola bilər. Bundan əlavə dəm qazından yaranan zəhərlənmələr də bu sıraya daxildir.

Boğulmalar- bura suda boğulma başda olmaqla, dənəli qida maddələri və xarici cisim udmaları, səhv yatış və duruş səbəbi ilə boğulma və s. aiddir.

Suda boğulmalara duş, evdə istifadə üçün yığılan suların doldurulduğu geniş qablar, vedrələr, bağçada yağış və ya sulama nəticəsində yaranan hovuzcuqlar, xüsusilə üzmə hovuzları əsas səbəb olan vasitələrdir. Uşaqların suda oynamağı sevmələri, 4-5 yaşlarına qədər sudan qorxmamaları, xüsusilə heç bir təhlükənin fərqində olmayan 1-3 yaş arası uşaqların (bu yaşda heç üzmə qabiliyyətləri yoxdur) üzmə hovuzlarına, böyük su yığınlarına atlanmaları onları boğulma riski ilə qarşı-qarşıya qoyur.

Digər boğulma dənəli qida maddələri, xarici cisimləri udma səbəbilə meydana gəlir. Uşaq doğulduğu andan etibarən ətrafını, ətrafındakı obyektləri və hər şeyi tanımaq istəyir və bunu, toxunaraq, ağzına götürərək edir. Xüsusilə də iməkləməyə başlaması ilə evdə xeyli çox yerə çata biləcəyindən bu risk artır. Boğulmalara əsasən kiçik dənəli sərt yeməklər, qidaların qabıqları, həmçinin medal, qəpik, sırğa, vint kimi cisimlərin udulması   səbəb olur.

Boğulmanın digər səbəbi isə uşağın yatış şəklindən qaynaqlanır. Belə ki, səhv yatış və duruş da boğulmaya gətirib çıxarır.

Kiçik yaşlı uşaqların bu kimi hallarla qarşılaşmaması üçün onlara nəyisə izah etmək mümkün deyil. Bu səbəbdən valideynlər, uşaqlara baxan böyüklər belə hallara səbəb ola biləcək şəraitlərin yaranmasına imkan verməməli və son dərəcə diqqətli olmalıdırlar.

 

 



Fövqəladə hallarla bağlı davranış qaydaları
Avtomobil qəzaları

Avtomobil qəzaları zamanı müəyyən təhlükəsizlik qaydalarına əməl etməklə həyati təhlükələrdən xilas ola bilərik.

Qəza zamanı nə etməli:                         

-qəza zamanı, ilk növbədə, başınızı qoruyun;

-avtomobili idarə edirsinizsə, sükandan möhkəm tutaraq oturacağa sıxılın;

-ön oturacaqda əyləşmisinizsə, oturacağa möhkəm sıxılıb əllərinizlə başınızı qoruyun;

-arxa oturacaqda əyləşmisinizsə və mümkündürsə, yerə əyilib əllərinizlə başınızı qoruyun;

-yanınızda uşaq varsa, onu bədəninizə sıxıb qoruyun.

Qəzadan sonra nə etməli:

-təşvişə düşməyin və sakitliyinizi qoruyun;

-təhlükəsizlik üçbucağı və qəza işıqlarından istifadə etməklə ətrafdakıları xəbərdar edin;

-qəza ciddidirsə, "112" qaynar xəttinə məlumat verin;

-xəsarət alan varsa, təcili yardım çağırın;

-qəza nəticəsində avtomobilin alışma ehtimalı olduğundan vəziyyəti dəqiq qiymətləndirin;

-qapıları açmaq mümkün deyilsə, pəncərəni açaraq və ya sındıraraq avtomobili tərk edin;

-qəza ciddidirsə, mümkün yanğın və ya partlayışdan qorunmaq üçün maşını tərk edərək ərazidən uzaqlaşın.

Avtomobil suya düşən zaman nə etməli:

-avtomobil suya düşdükdə dərhal təhlükəsizlik kəmərini açın və vaxt imkan verirsə, artıq geyimlərdən azad olun, vacib sənədlərinizi və pulunuzu götürün;

-əgər avtomobil hələ tam batmayıbsa və suyun üzərindədirsə, qapını açıb avtomobildən çıxın;

-əgər avtomobil batırsa, nəzərə alın ki, qapı açıldıqda avtomobil sürətlə bata bilər. Bu səbəbdən, həm də su avtomobilin elektrik sistemini sıradan çıxardığından küləyə qarşı ön və ya arxa alın pəncərələri ("podpres") sındıraraq maşını tərk edin və cəld suyun üzərinə qalxın.



Föv­qə­la­də Hal­lar Na­zir­li­yi xə­bər­dar­lıq edir:
Dəm qazı təhlükəsi

 

 

 

 

 

 

 

 

 

 

 



"112"/"101" QAYNAR TELEFON XƏTTİNƏ BU HALLARDA MÜRACİƏT ETMƏK OLAR:

 

 

 

 

 

 

 

 

 

 

 

 

 

 

 

 

 



Qəzetin çap variantı




Qəzet Azərbaycan Respublikasının Ədliyyə Nazirliyində qeydiyyatdan keçmişdir. Qeydiyyat nömrəsi - 1873.
Təsisçi Azərbaycan Respublikası Fövqəladə Hallar Nazirliyi.
Bütün hüquqlar qorunur.
© 2009-cu il