Fövqəladə Hallar Nazirliyinin çimərliklərlə bağlı təhlükəsizlik qaydaları ilə əlaqədar əhaliyə müraciəti

Yayda çimərlikdə xoş zaman keçirmək üçün hər birimiz təhlükəsizlik qaydalarını bilməliyik.

Qadağandır:

- nəzərdə tutulmamış ərazilərdə çimmək;

- çimmə zonasının işarələnmiş sərhədlərindən kənara üzmək;

- küləkli havada dənizə girmək;

- çimərlikdə gecələmək,

- sərxoş halda çimərlikdə olmaq;

- suda kobud hərəkətlər etmək;

- çimərlikdə balıq tutmaq;

- xilasetmə texnikasından başqa digər qayıq və kiçik gəmilərlə çimərliyə daxil olmaq!

Yadda saxlayın:

Çimərlikdə uşaqlar nəzarətsiz qalmamalı, xəbərdaredici nişan və lövhələrin göstərişlərinə, xilasedicilərin çağırış və tələblərinə sözsüz əməl edilməlidir!

Qızmar günəş altında fasiləsiz dayanmaq, hava qaraldıqdan sonra suya daxil olmaq təhlükəlidir!

Çimərliklərdə istirahət saat 9:00-dan 20:00-dək daha təhlükəsizdir!

Unutmayın: Qaydalara biganəlik - həyatımıza təhlükədir!

Təhlükə zamanı 112-yə zəng edin!

Fövqəladə Hallar Nazirliyi və BMT İP-ın birgə layihəsi çərçivəsində görülən işlər ətraflı müzakirə olunmuşdur

Azərbaycan Respublikasının Fövqəladə Hallar Nazirliyi və BMT İnkişaf Proqramının (BMT İP) birgə təşkilatçılığı ilə avqustun 4-də FHN Akademiyasında "Böyük Qafqaz regionunda zəif dağ icmaları tərəfindən su və daşqınlar üzrə idarəetməyə iqlim dəyişikliyi risklərinin daxil edilməsi" layihəsi çərçivəsində "Su və dayanıqlı inkişaf" mövzusunda konfrans keçirilmişdir.

Konfransda FHN və BMT İP ilə yanaşı, Ekologiya və Təbii Sərvətlər Nazirliyinin, Azərsu" ASC,  AMEA Coğrafiya, Geologiya və Geofizika, habelə Zoologiya institutlarının,  Bakı Dövlət Universiteti və Azərbaycan Dövlət Pedaqoji Universitetinin məsul əməkdaşları iştirak etmişlər.

Qeyd edək ki, layihənin əsas məqsədi su və daşqınlar üzrə idarəetməni təkmilləşdirməklə, Azərbaycanın dağ icmalarının su çatışmazlığı və daşqın təhlükələrinə qarşı zəifliyini azaltmaqdır. Layihə, həmçinin, qanunvericilik və siyasət səviyyəsində idarəetmə bazasının təkmilləşdirilməsi, təşkilati potensialın gücləndirilməsi və icmaların su və daşqınlar üzrə idarəetmədə aktiv iştirak etmələri üçün təlimlərin keçirilməsini nəzərdə tutur.

Əvvəlcə tədbir iştirakçıları Akademiyanın həyətində ümummilli lider Heydər Əliyevin xatirəsinə ucaldılmış abidənin önünə əklil qoymuşlar.

Tədbiri giriş sözü ilə açan FHN Akademiyasının rəisi general-mayor Pənah Süleymanov sözügedən konfransın böyük əhəmiyyətə malik olduğunu bildirərək su siyasətinə dair elmi müzakirələrin aparılmasının ölkəmizin həmin sahədəki problemlərinin həllinə önəmli töhfələr verəcəyinə əmin olduğunu bildirmişdir. O, FHN Akademiyasında kursant və magistrlara su hövzələrinin təhlükəsizliyinin təmin olunması ilə bağlı elmi biliklərin aşılandığını diqqətə çatdırmışdır.

BMT İP-in strateji əməkdaşlıq üzrə müşaviri Məzahir Əfəndiyev qeyd etmişdir ki, qarşıdan gələn illər ərzində üzləşəcəyimiz ən ciddi qlobal məsələlərdən biri iqlim dəyişiklikləri olacaqdır. Bu proseslər hamımıza bu və ya digər formada təsir edəcəkdir. Artıq təhlükəli zonalarda yaşayan insanlar daşqın və quraqlıq halları ilə daha tez-tez və daha geniş maqnitudada üzləşirlər. Qrunt və səth suları, yüksəklik və düzənlik zonalarındakı su istifadəçiləri arasındakı sıx əlaqəni, eləcə də müxtəlif su istifadəçiləri arasındakı qarşılıqlı əməkdaşlığı nəzərdə tutan əlaqələndirilmiş bir yanaşma suyun müasir səviyyədə idarə edilməsi üçün əsas amildir. "Bu məqsədlə layihə çərçivəsində hüquqi yanaşma və qabaqcıl təcrübələrə əsasən su ehtiyatlarından vahid istifadənin icrasına tam dəstək verə bilən mərkəzi institusional struktur haqqında tövsiyələri özündə ehtiva edən sənədlər hazırlanmışdır", - deyən M. Əfəndiyev prioritet məsələləri dəstəkləyən Dayanıqlı İnkişaf Məqsədləri və bu məqsədlərin icrasına Prezident İlham Əliyev tərəfindən verilən önəmdən danışmışdır.

Sonra FHN Su Ehtiyatları Dövlət Agentliyinin məsul əməkdaşı Elnar Sultanov təmsil etdiyi qurumun fəaliyyəti və perspektiv planları barədə ətraflı məlumat vermişdir.

FHN-in məsul işçisi Fərid Abbasov sözügedən layihə çərçivəsində görülmüş işlər və əldə edilən nəticələr haqqında hesabatla çıxış etmişdir.

Tədbirdə "Böyük Qafqaz regionunda zəif dağ icmaları tərəfindən su və daşqınlar üzrə idarəetməyə iqlim dəyişikliyi risklərinin daxil edilməsi" layihəsinə dair videoçarx nümayiş olunmuşdur.

Videoçarxın nümayişindən sonra "AzərSu" ASC "Sukanal" Elmi-Tədqiqat və Layihə İnstitutunun əməkdaşı Rəşail İsmayılov "Azərbaycanda su ehtiyatlarının davamlı idarə olunmasının  iqtisadiyyatın yeni  inkişaf mərhələsində rolu" mövzusunda məruzə ilə, FHN Su Ehtiyatları Dövlət Agentliyinin əməkdaşı Elnar Sultanov isə "Mingəçevir su anbarında gursululuq dövrünə (aprel-iyul) hazırlıq üçün hədəf su səviyyəsinin müəyyənləşdirilməsi" mövzusunda təqdimatla çıxış etmişlər.

Konfransın panel müzakirələr və təqdimatlar bölümündə layihə üzrə ekspert Rövşən Abbasov, Ekologiya və Təbii Sərvətlər Nazirliyinin Milli Hidrometeorologiya Departamentinin məsul işçisi Asif Verdiyev, FHN SEDA-nın əməkdaşları Samir Abbasov və Yusif Əhədi, FHN Akademiyasının magistrantı Ramazan Ramazanov müxtəlif məruzələr və təqdimatlarla çıxış etmişlər.

Konfransın sonunda məruzə olunan mövzular ətrafında müzakirələr aparılmış və qərara alınmışdır ki, həm dinlənilən məruzələr, həm də konfransa göndərilən elmi materiallar toplu halında nəşr olunsun.

Dövlət Yanğından Mühafizə Xidmətində cari ilin ötən dövrü ərzində baş vermiş yanğınlarla bağlı əməliyyat şəraitinin, şəxsi heyətin nizam-intizamının, peşə, döyüş və fiziki hazırlığının vəziyyəti müzakirə edilmişdir

Fövqəladə Hallar Nazirliyinin Dövlət Yanğından Mühafizə Xidmətində 2017-ci ilin ötən dövrü ərzində baş vermiş yanğınlarla bağlı əməliyyat şəraitinin   və şəxsi heyətin nizam-intizamının, peşə, döyüş və fiziki hazırlığının vəziyyətinin müzakirəsinə həsr olunmuş  müşavirə keçirilmişdir.   

DYMX-nin  Bakı  qarnizonunun  Dövlət Yanğından Mühafizə idarə, dəstə, hissə  rəislərinin iştirak etdiyi müşavirəni giriş sözü ilə açan Dövlət Yanğından Mühafizə Xidmətinin rəisi daxili xidmət general-mayoru Füzuli Əsədov müzakirə olunacaq məsələləri müşavirə iştirakçılarının nəzərinə çatdırmış, 2017-ci ilin ötən dövrü ərzində baş vermiş yanğınlar və onların ilkin statistik nəticə və göstəricilərini təhlil etmişdir.

Müşavirədə baş verəcək yanğınların operativ söndürülməsi və bu istiqamətdə müvafiq əməliyyat tədbirlərinin daha effektiv həyata keçirilməsi  üçün müvafiq tapşırıq və tövsiyyələr verilmiş,  yüksək saylı çağırışla söndürülən  yanğınlar zamanı hadisə yerinə cəlb olunmuş bölmələrin döyüş hərəkətlərində, həlledici istiqamətlərin düzgün seçilməsində, yanğının idarə olunması zamanı yanğınsöndürmə rəhbərləri tərəfindən yol verilmiş nöqsan və çatışmazlıqlar müzakirə olunmuş, mövcud nöqsanların aradan qaldırılması üçün tapşırıqlar verilmişdir.

Müşavirədə həmçinin Dövlət Yanğından Mühafizə Xidmətinin struktur bölmələrində mənəvi-psixoloji mühitin sağlamlaşdırılması, şəxsi heyət arasında təlim-tərbiyənin, nizam-intizamın gücləndirilməsi istiqamətində görülmüş işlərdən danışılmış, əməkdaşların ilkin hazırlıq, ixtisasartırma, xüsusi hazırlıq, tədris toplanışı və yenidən hazırlığı məqsədi ilə həyata keçirilmiş tədbirlər, yanğın texnikalarının təmiri,  istismarının təşkili və sürücülərin hazırlığı, rabitə avadanlıqlarının quraşdırılması və təmiri istiqamətlərində görülmüş işlər müzakirə edilmiş və yanğından mühafizə qurumları qarşısında vəzifələr qoyulmuşdur.

Müqavilə əsasında mühafizə olunan obyektlərin yanğına qarşı vəziyyətinin bir daha nəzərdən keçirilməsi, obyektlərə məxsus nəzarət-baxış qovluqlarının yoxlanılaraq mövcud çatışmazlıqların aradan qaldırılması, yanğına qarşı hazırkı durumun qiymətləndirilməsi, yanğına qarşı təbliğat işinin keyfiyyətinin artırılması, maarifləndirmə işlərinin şəbəkəsinin genişləndirilməsi də  müşavirədə müzakirə olunmuş, Dövlət Yanğından Mühafizə Xidmətinin müvafiq qurumlarına tapşırıqlar verilmişdir.

Müşavirədə Bakı və Sumqayıt şəhərlərində məcburi köçkünlərin məskunlaşdığı yataqxana və tikintisi yarımçıq qalmış binaların, eləcə də bazar və iri ticarət mərkəzlərinin yanğına qarşı vəziyyətinin öyrənilərək müvafiq tədbirlər görülməsi ilə bağlı tapşırıqlar verilmişdir.

FHN Dövlət Yanğından Mühafizə Xidmətinin

İctimaiyyətlə əlaqələr və təbliğat sektoru

"Su hövzələrində təhlükəsizliyin təmin olunması istiqamətində birgə fəaliyyətin təşkili"

Fövqəladə Hallar Nazirliyinin Aran Regional Mərkəzi  Kiçik Həcmli Gəmilərə Nəzarət və Sularda Xilasetmə Dövlət Xidməti ilə birlikdə Yevlax rayon Şahmat məktəbinin akt zalında "Su hövzələrində təhlükəsizliyin təmin olunması istiqamətində birgə fəaliyyətin təşkili" mövzusunda rayon müşavirəsi keçirmişdir.

Rayon müşavirəsində FHN-in Aran Regional Mərkəzinin, Kiçik Həcmli Gəmilərə Nəzarət və Sularda Xilasetmə Dövlət Xidmətinin, Yevlax rayon İcra Hakimiyyətinin, yerli icra orqanlarının, xidmət sahələrinin əməkdaşları, bələdiyyələrin nümayəndələri, eləcə də su hövzələrinin fəaliyyətinə məsul şəxslər iştirak etmişlər.

Toplantıda Yevlax rayonu ərazisindəki su hövzələrində keçirilən monitorinqin nəticələri barədə tədbir iştirakçıları məlumatlandırılmış, aşkar olunmuş nöqsanlar fotoslaydlarla nümayiş etdirilmişdir. Həmin nöqsanlar müzakirə edilmiş, problemlərin aradan qaldırılması istiqamətində atılacaq addımlar barədə fikir mübadiləsi aparılmışdır.

Çıxışlarda Kiçik Həcmli Gəmilərə Nəzarət və Sularda Xilasetmə Dövlət Xidmətinin fəaliyyət istiqamətləri, yay mövsümündə su hövzələrində vətəndaşların təhlükəsizliyinin təmin olunması qaydaları, maarifləndirmə işinin vəziyyəti ilə bağlı ətraflı məlumat verilmişdir.

Tədbirdə, həmçinin, ölkə ərazisindəki su hövzələrində həyata keçirilmiş təhlükəsizlik tədbirləri ilə bağlı məlumatlar iştirakçıların diqqətinə çatdırılmış, mövzuya dair videoçarx nümayiş etdirilmişdir.

Sonda sularda təhlükəsizlik qaydaları ilə bağlı zəruri məlumatların əks olunduğu təbliğat materialları tədbir iştirakçılarına paylanılmışdır. Tədbir iştirakçılarını maraqlandıran suallar FHN əməkdaşları tərəfindən cavablandırılmışdır.

Xəzər Hövzə Qəza-xilasetmə Xidməti işçiləri Həmkarlar İttifaqı Komitəsində hesabat-seçki konfransı keçirilmişdir

Fövqəladə Hallar Nazirliyinin Xəzər Hövzə Qəza-xilasetmə Xidməti işçiləri Həmkarlar İttifaqı Komitəsində hesabat-seçki konfransı keçirilmişdir.

İlk olaraq, FHN işçiləri Həmkarlar İttifaqının sədri Mehman İsmayılov çıxış edərək rəhbərlik etdiyi ittifaq və görülmüş işlər haqqında məlumat vermişdir.

M. İsmayılov çıxışı zamanı komitə üzvlərinə iş zamanı əməyin texniki təhlükəsizliyi qaydalarına əməl etmələri barədə öz tövsiyələrini vermiş, konfransın işinə  uğurlar arzulamışdır.

Sonra Xəzər Hövzə Qəza-xilasetmə Xidməti işçiləri Həmkarlar İttifaqı Komitəsinin sədri  Elxan Abdullayevin geniş hesabat məruzəsi dinlənilmişdir. Natiq bildirmişdir ki, onun rəhbərlik etdiyi təşkilat öz işini bundan sonra da müasir tələblər səviyyəsində quracaq, qarşıya qoyulmuş vəzifələri növbəti illərdə də uğurla davam etdirəcəkdir.

Konfransın sonunda Fövqəladə Hallar Nazirliyinin Xəzər Hövzə Qəza-xilasetmə Xidmətinin rəisi Fuad Bağırov çıxış edərək rəhbərlik etdiyi mərkəzin işçilərinə göstərdiyi qayğıya, onların asudə vaxtlarını səmərəli keçirməsi, səhhətində problem yaranmış işçilərin sağlamlığının bərpa olunması məqsədilə ixtisaslaşmış sanatoriyalara yollayışların verilməsinə, ailə vəziyyəti çətin olan işçilərə maddi yardımların edilməsi, xidmətdə xüsusi fərqlənən və yubiley yaşı tamam olan üzvlərin fəxri fərman və qiymətli hədiyyələrlə mükafatlandırılmasına görə Fövqəladə Hallar Nazirliyi işçiləri Həmkarlar İttifaqına öz təşəkkürünü bildirmişdir.

Konfransda Elxan Abdullayev yenidən Xəzər Hövzə Qəza-xilasetmə Xidməti işçiləri Həmkarlar İttifaqı Komitəsinin sədri seçilmişdir.

Fövqəladə hallar zamanı davranış qaydaları barəsində ətraflı məlumat verilmişdir

Fövqəladə Hallar Nazirliyinin Şimal Regional Mərkəzi Şabran rayonu Ağalıq kənd poliknika şöbəsində və  Xaçmaz rayonu Yeni Həyat qəsəbə sahə xəstəxanasında "Fövqəladə hallarla bağlı davranış və yanğın təhlükəsizliyi qaydaları" mövzusunda növbəti seminar-müşavirələr keçirmişdir.

Tədbir zamanı yanğın, zəlzələ, meşədə və məişətdə yanğın, ildırım zamanı və çimərlikdə təhlükəsizlik qaydaları kimi mövzular geniş müzakirə olunmuşdur.

Tədbir iştirakçılarına FHN-in fəaliyyət istiqamətləri və qurumları, fəlakətə səbəb ola biləcək amillərin aradan qaldırılmasında ilkin xəbərdarlıq sisteminin əhəmiyyəti, yanğınların baş verməsində insan faktoru, sel və daşqın zamanı hərəkət qaydaları, Şimal Regional Mərkəzinin regionda yerləşən dövlət qurumları ilə qarşılıqlı fəaliyyətinin əhəmiyyəti, fövqəladə hadisələrin vaxtında aradan qaldırılmasında "112" qaynar xəttinin rolu kimi mövzularda ətraflı məlumat verilmişdir.

Sonda mövzularla bağlı video və fotoslaydlar nümayiş olunmuşdur.

***

Fövqəladə Hallar Nazirliyinin Şimal-qərb Regional Mərkəzi Zaqatala rayonu Gözbarax kənd İnzibati Ərazi Nümayəndəliyində "Fövqəladə hallarla bağlı davranış qaydaları" mövzusunda dəyirmi masa keçirmişdir.

Dəyirmi masada kənd inzibati ərazi nümayəndəliyinin əməkdaşları, bələdiyyə üzvləri, təhsil müəssisəsinin kollektivi, tibb məntəqəsinin həkim heyəti və kənd ictimaiyyəti iştirak etmişdir.

Dinləyicilərə Mərkəz əməkdaşları tərəfindən zəlzələ, dəm qazı, yanğın təhlükəsizliyinin təmin olunması üçün qarşıda duran vəzifələr, texniki təhlükəsizlik qaydaları və "112" qaynar xətti haqqında geniş məlumat verilmişdir. Mövzulara dair məruzələr videoslaydların müşayiəti ilə təqdim olunmuşdur.

***

Fövqəladə Hallar Nazirliyinin Muğan Regional Mərkəzi "Azərişıq" ASC-nin Şirvan Regional Enerji Təchizatı və Satışı İdarəsində "Fövqəladə hallarla bağlı davranış qaydaları və yanğın təhlükəsizliyi" mövzusunda tədbir keçirmişdir.

Tədbirdə müəssisənin kollektivi, Muğan Regional Mərkəzinin və Şirvan DYMD-nin əməkdaşları iştirak etmişdir.

Tədbir zamanı Muğan Regional Mərkəzinin əməkdaşları "112 qaynar xətti", "Sel və daşqın", "Məişətdə yanğın zamanı davranış qaydaları", "Dəm qazı", "Çimərlikdə təhlükəsizlik qaydaları", "Odsöndürücü balondan istifadə qaydaları", "Meşə yanğınları" və digər mövzularda çıxışlar etmiş,  təbii və texnogen xarakterli fövqəladə hallar, onların xüsusiyyətləri, fövqəladə hal baş verdikdə davranış qaydaları və s. haqqında geniş məlumatlar vermişlər. Tədbirdə mövzulara uyğun videoçarxlar nümayiş olunmuşdur.

***

Fövqəladə Hallar Nazirliyinin Cənub Regional Mərkəzi Cəlilabad Rayon Mərkəzi Xəstəxanasında FHN-in regionda fəaliyyət göstərən digər qurumları ilə birgə "Fövqəladə halların qarşısının alınması və nəticələrinin aradan qaldırılması sahəsində Cənub Regional Mərkəzi ilə yerli qurumlar  arasında qarşılıqlı fəaliyyətin təşkili" mövzusunda dəyirmi masa keçirmişdir.

Tədbirdə Cəlilabad Rayon Mərkəzi Xəstəxanasının tibb personalı ilə yanaşı texniki işçilər də iştirak etmişdir.

Dəyirmi masada fövqəladə halların nəticələrinin aradan qaldırılması zamanı qarşılıqlı fəaliyyətin təşkili, təbii və texnogen xarakterli fövqəladə hadisələr zamanı davranış qaydaları, dəm qazı təhlükəsinin yaranma səbəbləri, fərdi mühafizə vasitələrindən və ilkin yanğınsöndürmə avadanlıqlarından istifadə qaydaları, çimərliklərdə təhlükəsizlik tədbirləri, eləcə də yanğın və texniki təhlükəsizlik qaydalarının tələblərinə düzgün riayət olunması barədə məlumat verilmiş, hər mövzu ilə bağlı fotoslayd nümayiş olunmuşdur.

Sonda tədbir iştirakçılarına maarifləndirici yaddaş kitabçaları və xəbərdarlıq vərəqələri paylanılmışdır.

***

Fövqəladə Hallar Nazirliyinin Sumqayıt Regional Mərkəzi Xırdalan şəhəri ərazisində yerləşən parklarda maarifləndirmə və təbliğat işi həyata keçirmişdir.

Xırdalan şəhər sakinləri arasında "Fövqəladə hallarla bağlı davranış və yanğın təhlükəsizliyi qaydaları" mövzusunda söhbətlər aparılmış, yanğın təhlükəsizliyi qaydalarına əməl etmələri tövsiyə olunmuşdur.

Həmçinin, yanğın baş verə biləcək ərazilərdə qabaqlayıcı tədbirlər barədə məlumat verilmişdir.

Sakinlərə təbliğat xarakterli bukletlər paylanılmış, suallar cavablandırılmışdır.

Dövlət Yanğın Nəzarəti Xidməti Bakı Regional Mərkəzi ilə birgə maarifləndirmə tədbiri keçirmişdir

FHN Dövlət Yanğın Nəzarəti Xidməti Bakı Regional Mərkəzi ilə birgə K. Fərəcova adına Elmi-Tədqiqat Pediatriya İnstitutunda yanğın təhlükəsizliyinə dair maarifləndirmə tədbiri keçirmişdir.

İnstitut kollektivinin iştirakı ilə keçirilən tədbirdə səhiyyə müəssisələrində yanğın təhlükəsizliyi qaydalarına əməl edilməsinin vacibliyi qeyd olunaraq bildirilmişdir ki, sözügedən sahənin ərazisi və binaları həmişə təmiz saxlanılmalı, zibil və tullantılar müntəzəm surətdə xüsusi ayrılmış yerlərə daşınmalıdır. Səhiyyə müəssisələrinin binaları yanğınları söndürmək üçün daimi su ehtiyatı ilə təmin edilməlidir. Əczaxana və əczaxana anbarlarında yanğın baş verdikdə müvafiq müəssisə rəhbərləri zəhərli və partlayış təhlükəli maddələrin olması və saxlanılması yerləri haqqında yanğından mühafizə xidmətinin əməkdaşlarını xəbərdar etməlidir.

Həmçinin qeyd olunmuşdur ki, ümumi xəstəxana korpusundakı əczaxanalar bir qayda olaraq birinci mərtəbədə yerləşdirilməli, binadan bayıra müstəqil çıxışı olmalı və başqa təyinatlı otaqlardan yanmayan örtüklər və divarlarla ayrılmalıdır. Su qızdırıcıları və su qaynatmaq üçün xüsusi qurğulu böyük çənlər yalnız mətbəxlərdə, yaxud bu məqsədlər üçün nəzərdə tutulmuş otaqlarda quraşdırıla bilər. Səhiyyə müəssisələrində laboratoriya və anbarlardakı reaktivlər açarla bağlanan şkaflarda saxlanılmalı, açarlar laborantlarda, yaxud digər məsul şəxslərdə olmalıdır. Ümumi miqdarı 3 kiloqramdan artıq olmamaq şərti ilə tezalışan və yanar mayelər yalnız xüsusi metal yeşikdə və qızdırıcı cihazlardan uzaq məsafədə saxlanıla bilər. Digər təyinatlı binalarda yerləşən əczaxanalarda tezalışan və yanar mayelərin ümumi miqdarı 100 kiloqramdan artıq olmamalıdır. Səhiyyə müəssisələrinin emalatxana, laboratoriya və digər istehsalat binalarında spirtin distillə edilməsi və təmizlənməsi üçün aparatlar, kompressorlar ayrıca otaqlarda quraşdırılmalı, spirt, benzin və digər tezalışan mayelər təcrid edilmiş anbarlarda saxlanılmalıdır.

Toplantının sonunda səhiyyə müəssisəsinin işçilərinə odsöndürən balonlardan istifadə qaydaları haqqında məlumat verilmiş, onlara yanğın təhlükəsizliyi ilə bağlı kitabça və bukletlər paylanmışdır.

Dövlət Yanğından Mühafizə Xidməti "SOCAR"ın Neft Kəmərləri İdarəsində yanğın-taktiki təlim keçirmişdir

Fövqəladə Hallar Nazirliyinin Dövlət Yanğından Mühafizə Xidməti "SOCAR"ın Neft Kəmərləri İdarəsinin Dübəndi İstehsalat bölümünün 9 saylı çənlər parkında "Neft və neft məhsullarının saxlandığı çənlərdə baş vermiş yanğının söndürülməsi" mövzusunda yanğın-taktiki təlim keçirmişdir.

Təlimə Dövlət Yanğından Mühafizə Xidmətinin ARDNŞ-in obyektləri üzrə Yanğından Mühafizə İdarəsinin rəisi daxili xidmət polkovniki Valid Quliyev rəhbərlik etmişdir. Tədbirin keçirilməsində məqsəd yanğın kəşfiyyatının aparılması, yanğının vəziyyətinin qiymətləndirilməsi, qərarların qəbulu, müvafiq göstərişlərin verilməsi, qüvvə və vasitələrin idarə olunması, yanğının həlledici istiqamətinin müəyyənləşdirilməsi, döyüş sahələrindəki qüvvələrin idarə olunması, qonşu sahə rəisləri və əməliyyat qərargahı ilə qarşılıqlı hərəkətlə bağlı qarşıda duran vəzifələrin icrası istiqamətində şəxsi heyətin taktiki hazırlığının yüksəldilməsi olmuşdur.

Təlimdə "SOCAR"ın Neft Kəmərləri İdarəsinin  Dübəndi İstehsalat bölümünün 9 saylı çənlər parkının mühəndis-texniki heyəti də iştirak etmişdir.

 Təlim zamanı obyektin xidmətçi heyətinə şərti yanğın haqqında məlumat daxil olan kimi qəzanın ləğv edilməsi planı üzrə müvafiq hərəkətlər icra olunmuş, yanğın hissələri təlim obyektinə gəldikdən sonra yanğınsöndürmə rəhbəri tərəfindən əməliyyat şəraiti qiymətləndirilmiş və müvafiq qərarlar qəbul olunmuş, yanğınsöndürmə qərargahı, arxa cəbhə və obyekt rəhbərliyi ilə qarşılıqlı hərəkətlər təşkil edilmişdir. Döyüş tapşırıqları icra olunaraq  yanan 907 saylı və qonşu çənlər soyudulmuş, köpük hücumu icra olunduqdan sonra şərti yanğın söndürülmüşdür.

Yanğın-taktiki təlimdə döyüş hərəkətləri zamanı şəxsi heyətin təhlükəsizlik məsələləri də diqqət mərkəzində saxlanılmışdır. Beləliklə, yanğın-taktiki təlim qarşıya qoyulan məqsədə nail olunmaqla yekunlaşmışdır.

Təlimdən sonra əməkdaşların yanğının inkişafı və söndürülməsi zamanı fəaliyyəti, şəxsi heyətin yanğında yaranmış şəraiti düzgün qiymətləndirmək, onun mürəkkəbləşə biləcəyini və nəticələrini qabaqcadan görmək, yanğında döyüş hərəkətlərinin həlledici istiqamətini düzgün təyin etmək bacarıqları dəyərləndirilmiş, yol verilmiş nöqsanlar müzakirə edilmiş, belə halların gələcəkdə təkrar olunmaması üçün müvafiq tapşırıqlar verilmişdir. Təlimin nəticələrinə yekun vurularkən neft çənlərində yanğınların ləğv edilməsi, qəzaların nəticələrinin aradan qaldırılması zamanı və digər mürəkkəb xarakterli xüsusi şəraitlərdə qüvvə və vasitələrin bacarıqla idarə olunması, taktiki imkanlardan maksimum istifadə etməklə onları döyüş hərəkətlərinin həlledici istiqamətlərində operativ olaraq cəmləşdirib yeridilməsi, yanğınların söndürülməsi üzrə dəqiq və əsaslandırılmış qərarların qəbulu istiqamətində vəzifələrin icrası ilə bağlı  ARDNŞ-in obyektləri üzrə Yanğından Mühafizə İdarəsinin müvaiq qurumları, həmçinin "SOCAR"ın Neft Kəmərləri İdarəsinin  Dübəndi İstehsalat bölümünün 9 saylı çənlər parkının mühəndis-texniki heyəti qarşısına vəzifələr qoyulmuşdur. 

Sonda "SOCAR"ın Neft Kəmərləri İdarəsinin nümayəndəsi neft sənayesinin yanğın təhlükəsizliyinin təmin olunması ilə bağlı tədbirlərin təşkilinə görə Fövqəladə Hallar Nazirliyinə minnətdarlığını bildirmişdir.

Xüsusi - taktiki təlimdə çağırış zamanı xilasedici qrupların hərəkətləri yoxlanılmışdır

Fövqəladə Hallar Nazirliyi Xüsusi Riskli Xilasetmə Xidmətinin şəxsi heyəti "Bakı Metropoliteni" Qapalı Səhmdar Cəmiyyətinin Avtovağzal metrostansiyasında çağırış zamanı xilasedici qrupların hərəkətləri mövzusunda xüsusi - taktiki təlim keçirmişdir.

Təlimin əsas məqsədi Xidmətin şəxsi heyətinin təsdiq edilmiş xəbərdaretmə sxeminə uyğun olaraq  müəyyən olunmuş vaxt çərçivəsində təyin olunmuş ərazidə toplanışın yoxlanılması, xilasetmə və mühafizə işlərinin təşkili sahəsində təcrübələrinin artırılması, Metropolitendə (real şəraitə uyğun olaraq) xilasetmə, mühafizə və ilkin təxirəsalınmaz tibbi yardımın göstərilməsi sahələri üzrə praktiki bilik və bacarıqlara daha dərindən yiyələnməsinə nail olmaq, xilasetmə və mühafizə işlərinin təşkilində komandirlərin bacarıqlarını və qərargahın uzlaşmasını praktiki fəaliyyətdə yoxlamaq, partlayıcı qurğuların aşkar edilməsi, zərərsizləşdirilməsini öyrənməkdən ibarət olmuşdur. Bakı şəhəri metropoliten stansiyalarında və hərəkət qatarlarında axtarış və qəza-xilasetmə işlərinin aparılması zamanı Xüsusi Riskli Xilasetmə Xidmətinin və Bakı Metropoliten xidmətlərinin qarşılıqlı fəaliyyəti həmçinin əsas məqsədlərdən biridir.

İlkin olaraq Xidmətin idarə və dəstələrinin hazırlıq vəziyyətinə gətirilərək təlim üzrə sənədlərin dəqiqləşdirilməsi və hadisə yerinə yürüş həyata keçirilmişdir. Şərti olaraq hadisə yerinə yaxın olan xilasetmə qrupları, kinoloqlar, mühafizəçilər, pirotexniklər xüsusi təyinatlı nəqliyyat vasitələri ilə hadisə yerinə yollanmışlar.

Xidmətin digər şəxsi heyəti toplanış məntəqəsinə gələrək idarə, dəstə və qrup komandirlərinin göstərişinə əsasən hadisə yerində xilasetmə və mühafizə işlərində iştirak etmək üçün hazırlıq tədbirlərinə başlamışlar. Hadisə yerində komanda - qərargah və tibb məntəqələri yaradılmışdır.

...Fövqəladə hallar rayonuna çatmış mühafizəçilər metropolitenin əməkdaşları ilə birlikdə stansiyanın ərazisini mühafizə edir, kənar şəxslərin stansiya ərazisinə daxil olmasının qarşısını alırlar.

Hadisə yerinə çatmaq üçün xilasedicilər stansiya rəisinin göstərişlərinə əməl edir və onun tərəfindən təyin edilmiş bələdçilərlə hərəkət edirlər. Hərəkət zamanı xilasedicilər, istehkamçılar zəruri olan alət və avadanlıqları hadisə yerinə aparırlar. Xilasedicilər hadisə yerinə çatdıqda kəşfiyyat işlərinə başlayırlar. 

Ən müasir xüsusi geyimlərlə və avadanlıqlarla təchiz edilmiş xilasedicilər kəşfiyyat zamanı qatarın relsdən çıxaraq qəzaya uğraması, çoxlu sayda sərnişinlərin xəsarət alması barədə qrup komandirlərinə məlumat verirlər. Məlumat verildikdən sonra xilasedicilər dərhal xilasetmə işlərinə başlayırlar. Xilasetmə alət və avadanlığından istifadə edərək qəzaya uğramış qatardan zərərçəkmişləri çıxarır, onlara ilk tibbi yardım göstərir və xərəklər vasitəsi ilə metropolitenin şəxsi heyəti ilə birlikdə təxliyə işlərini həyata keçirirlər.  

Xüsusi taktiki təlimin yekunu olaraq xilasedici, pirotexnik-istehkam qruplar qəza-xilasetmə işləri sona çatdıqdan sonra kinoloqlarla birlikdə hadisə yerinə təkrar  baxış keçirir və komanda-qərargah məntəqəsinə məruzə edirlər.

FHN Xüsusi Riskli Xilasetmə Xidmətinin

İctimaiyyətlə əlaqələr sektoru