FHN yanğın təhlükəsizliyi ilə bağlı taktiki dərs keçirib (foto)

Fövqəladə Hallar Nazirliyinin Dövlət Yanğından Mühafizə Xidməti Xəzər Tibb Mərkəzində yanğın təhlükəsizliyi ilə bağlı taktiki dərs keçirib.

Tədbirdə DYMX-nin 6 nömrəli Yanğından Mühafizə Bölməsi və Tibb Mərkəzinin əməkdaşları iştirak ediblər.

Əvvəlcə, tədbirin nəzəri hissəsində FHN-in əməkdaşları tərəfindən Mərkəzin kollektivinə fövqəladə hallar, o cümlədən yanğınlar zamanı zəruri davranış qaydaları, təxliyə tədbirləri barədə ətraflı məlumat verilib.

Daha sonra praktik mərhələdə açıq havada yanğınsöndürən balondan istifadə qaydaları əyani şəkildə nümayiş etdirilib və iştirakçılar bu prosesdə bilavasitə iştirak ediblər.

Qeyd edək ki, bu cür tədbirlər Fövqəladə Hallar Nazirliyi tərəfindən mütəmadi olaraq təşkil olunur.