FHN-in regional mərkəzlərində silsilə mülki müdafiə kursları keçirilib

Fövqəladə Hallar Nazirliyinin regional mərkəzləri tərəfindən “2025-ci il üçün Mülki müdafiə kurslarının dinləyicilərlə komplektləşdirmə planları”na əsasən silsilə mülki müdafiə kursları keçirilib.

Belə ki, Sumqayıt Regional Mərkəzi tərəfindən “Yanğınsöndürmə manqalarının komandirləri”, Qarabağ Regional Mərkəzi tərəfindən “Yanğınsöndürmə dəstəsi komandirləri”, Cənub Regional Mərkəzi tərəfindən “Gənclərin çağırışaqədərki hazırlığı üzrə hərbi rəhbərlər”, Şimal-qərb Regional Mərkəzi tərəfindən “Bələdiyyə sədrləri” və “Xilasetmə manqa komandirləri”, Aran Regional Mərkəzi tərəfindən “Ümumtəhsil orta məktəbləri, kollec və peşə liseylərinin təlim tərbiyə işləri üzrə direktor müavinləri” kateqoriyaları üzrə mülki müdafiə kursları keçirilib.

Kursların keçirilməsində əsas məqsəd mülki müdafiə sahəsində maarifləndirmə işinin aparılması, fərdi və kollektiv mühafizə vasitələrindən, ilkin yanğınsöndürmə alət və avadanlıqlarından istifadə qaydalarının öyrədilməsi, eləcə də kurs iştirakçılarının mülki müdafiə qüvvə və vasitələrinin idarə edilməsi üzrə bacarıqlarının təkmilləşdirilməsi olub.

Kurslarda kollektiv mühafizə vasitələrindən istifadə, təxliyə planlarının düzgün hazırlanması, təbii və texnogen xarakterli fövqəladə hadisələr zamanı düzgün davranış, xilasetmə alət və avadanlıqlarından istifadə qaydaları izah edilib, həmçinin mövzulara dair fotoslayd və videoçarxlar nümayiş etdirilib.

Kursların yüksək səviyyədə keçirilməsi üçün FHN-in digər qurumlarının yerli struktur bölmələrinin əməkdaşları da tədris prosesində iştirak ediblər.

Sonda kursları müvəffəqiyyətlə başa vurmuş dinləyicilərə şəhadətnamələr təqdim edilib.