Fövqəladə Hallar Nazirliyi tərəfindən silsilə maarifləndirmə tədbirləri keçirilib

Fövqəladə Hallar Nazirliyinin aidiyyəti qurumları tərəfindən fövqəladə hallarla bağlı davranış qaydaları barədə əhalinin maarifləndirilməsi məqsədilə silsilə tədbirlər keçirilib.

Belə ki, FHN-in Dövlət Yanğın Nəzarəti, Kiçikhəcmli Gəmilərə Nəzarət və Sularda Xilasetmə Dövlət xidmətlərinin mütəxəssislərinin də iştirakı ilə Gəncə Regional Mərkəzi tərəfindən Gəncə şəhər M.Hadi adına 10 nömrəli və Samux rayonu Köbər kənd tam orta məktəblərində, Aran Regional Mərkəzi tərəfindən Yevlax şəhər N.Nərimanov adına 9 nömrəli tam orta məktəbində, Muğan Regional Mərkəzi tərəfindən İmişli rayon Qızılkənd kənd tam orta məktəbində, Qarabağ Regional Mərkəzi tərəfindən Ağdam rayon 118 nömrəli tam orta məktəbində, Şimal Regional Mərkəzi tərəfindən Şabran şəhər 3 saylı ümumi orta məktəbində, Şimal-qərb Regional Mərkəzi tərəfindən Balakən rayonu Aclıqbinə kənd ümumi orta məktəbində, Sumqayıt Regional Mərkəzi tərəfindən Sumqayıt Şəhər İcra Hakimiyyəti başçısının 4 nömrəli sahə inzibati ərazi dairəsi üzrə nümayəndəliyində və Sumqayıt şəhər 24 nömrəli tam orta məktəbdə maarifləndirmə tədbirləri keçirilib.

Tədbirlərin keçirilməsində məqsəd baş verə biləcək təbii və texnogen xarakterli fövqəladə hadisələrlə bağlı zəruri davranış qaydaları barədə vətəndaşlara müvafiq biliklərin verilməsi olub.

Tədbirlərdə fövqəladə halların təsnifatı, ölkəmiz üçün xarakterik olan fövqəladə hallar, o cümlədən yanğınların başvermə səbəbləri və bu zaman zəruri davranış qaydaları barədə ətraflı məlumat verilib, FHN-in “112” qaynar telefon xəttinin təyinatı izah olunub, sularda təhlükəsizliklə bağlı məsələlər diqqətə çatdırılıb və ilkin yanğınsöndürmə vasitələrindən istifadə qaydaları əyani şəkildə nümayiş etdirilib.

İnteraktiv formada keçirilən tədbirlər zamanı suallar ətraflı cavablandırılıb.